泰食之選

金邊泰國餐廳 PAD THAI

地址 : 粉嶺聯和墟聯和道53-56號嘉和軒地下一號舖

偶爾食過一次呢間泰國餐廳後，每次去聯和墟食飯，都心思思想去幫襯，因為呢度既食物實在太好味喇！！

酸辣鳳爪 ($25) - 我地覺得呢度既酸辣鳳爪係咁多間泰國餐館之中最好食架！D鳳爪醃得酸辣適中之餘，又夠爽，所以每次黎到都要食，必試！

泰式刺身蝦 ($88) - 成碟有14隻，估唔到有咁多，而且每隻都挑晒腸，乾乾淨淨，望落去D蝦非常生鮮有光澤，加上墊底D冰用保鮮紙包住，keep住D蝦冷凍狀態之餘，又較為衞生，配埋特別既醬汁就Perfect 喇！

冬陰功海鮮湯 ($68) - 比起其他泰國餐廳既冬陰功海鮮湯，呢度真係真材實料、包羅萬有，包括蝦、魚、青口、蟹柳、魷魚、磨菇同埋豆腐，味道再辣少少就更好喇！

豬頸肉金邊粉冬陰功湯底 ($25) - 好鍾意佢個湯底，裏面有蕃茄、紅蘿蔔同白蘿蔔，唔係得個辣字...

川辣口水雞 + 馬拉箋通菜及兩碗油飯套餐 ($98) - 原本呢個餐包果隻係海南雞黎既，不過因為我地太想試川辣口水雞喇，所以特登問下可唔可以改，又得喎，小店果然靈活好多！

無花無假，足足半隻雞，老實講，我地從來無係泰國菜館度食過咁嫩滑既雞架，醬油夠晒辣，正！

碟菜大大碟、熱騰騰，鑊氣夠而且馬拉箋又多，香噴噴好味道！

加多$5有個特飲，青檸梳打D青檸又厚又大片，好夠味...

除左野食好味道之外，侍應服務亦係值得一讚，當我地個冬陰功湯凍左，佢地自發地幫我地翻熱，而且態度良好，感覺親切，絕對係集團式經營所不能及既！除左以上介紹之外，其他都好好食架，我地極力推介！！